Хагийн хар нуурын морин аялал

Тайгын сувд хагийн хар нуур руу мориор аялсан тэмдэглэлээ хүргэж байна. Би бээр өөрийгөө Монголоороо овоо их аялсан даа гэж боддог байв. Гэтэл морин дэл дээр аялана гэдэг тэс өөр ертөнц, тэс өөр мэдрэмж юм. Машинд суугаад цонхоор байгалийг харах, морин дэл дээрээс байгаль ертөнцийг мэдрэх 2 өөр байх нь аргагүй биз ээ. Болж өгвөл та бүхэн мориор ганц нэгхэн өдөр бус олон хоног, чадвал 7 хоног аялаж үзээрэй. Монгол морьны хүч чадал, тэсвэр хатуужил, эх орныхоо байгалийн онгон тансагийг жинхэнэ утгаар нь морин аяллаас л мэдрэх болов уу. Морь унахад биеийн бүх булчин шөрмөс ажиллаж, бие чангарч онгон зэрлэг байгаль ойн хөвчийн дунд дэргүүлж явахад 5 мэдрэхүй сэргэн цог жавхаа илт нэмэгдэх ажээ. Хамтран ажилласан Орсоо компанийн хамт олонд талархлаа.