Сайт использует сервис веб-аналитики Яндекс Метрика с помощью технологии «cookie». Пользуясь сайтом, вы даете согласие на использование данной технологии.
Сербияның Нови-Сад қаласында өткен 23 жасқа дейінгі әлем чемпионатында қазақ спорты тарихында тұңғыш рет әйел балуандар арасынан алтын жүлде иеленген Шұғыла Өмірбек елге абыроймен оралды. 55 келі салмақ дәрежесінде ел намысын қорғаған түркістандық ару финалда бірнеше жас санатында Еуропа чемпионы атанған түркиялық Туба Демирді 12:8 есебімен айқын басымдықпен ұтып, әлемдік аренада Қазақстан әнұранын шырқатты. Жеңісті жолын жалғап, туған топыраққа табан тіреген чемпионды Шымкент халықаралық әуежайынан Түркістан қаласының әкімі Әзімбек Пазылбекұлы, облыстық дене шынықтыру және спорт басқармасының басшысы Ғалымжан Худияров бастаған делегация, бапкерлер, спорт жанашырлары және туған-туыстары зор қошеметпен қарсы алды. Салтанатты жиында Шұғыла Өмірбек өзіне қолдау білдірген барша жанға алғысын айтып, алдағы басты мақсаты — Олимпиада шыңын бағындыру екенін жеткізді. Чемпионаттағы жеңісті жолы: Михаэл Симон (Молдова) — 10:2 Александра Войчилеску (Румыния) — 3:1 Амори Андрих (Германия) — 2:0 Финал: Туба Демир (Түркия) — 12:8 Айта кетейік, 2017 жылдан бері ұйымдастырылып келе жатқан U23 әлем чемпионатында Қазақстан балуандары арасында қыздардан финалға дейін жеткен спортшы бұған дейін болмаған. Осылайша Шұғыла — тарихи нәтижеге қол жеткізген тұңғыш қазақ қызы. Сондай-ақ, 23 жасқа дейінгі әлемдік доданың тарихында бұған дейін екі спортшымыз ғана алтын алған еді: 2023 — Сұлтан Әсетұлы (67 кг, грек-рим) 2024 — Ризабек Айтмұхан (97 кг, еркін күрес) Шұғыланың бұған дейінгі ең ірі жетістігі — 2024 жылы Иорданияда өткен U23 Азия чемпионатындағы күміс жүлде болатын. ✅ Енді оның есімі әлем чемпионы атанған қазақ спортшыларының қатарына алтын әріппен жазылды! Құттықтаймыз! 🇰🇿✨ Жаңа жеңістерге жол ашылсын, Шұғыла!
