АҢДЫ ДА АДАМДЫ ДА АЯУСЫЗ ҚЫРҒАН. САБЫРБЕК ОЛЖАБАЙ "БҮЙРЕК".

Сабырбек Олжабай - қаламы қарымды журналист әрі талантты жазушы, саңлақ сатирик. Қаламгердің бірнеше драмалық шығармалары театрда сахналанып, прозалық туындылары түрік тіліне аударылған. Сабырбек Олжабайдың шығармалары көркемдік әдістердің сан алуандылығы мен терең ойға жетелейтін астарлы мәнінің молдығы арқылы ерекшеленеді. Жазушының сондай шығармаларының бірі - «Бүйрек» әңгімесі. Аталмыш туындыда автор осы заманғы өзекті тақырыптарды қозғайды. Қаламгер қазақтың кең байтақ киелі даласын, табиғатын аялауға, онда мекен ететін түрлі аң-құс, жан-жануарға қамқор болуды насихаттайды. Жазушы оларды қорғаудың орнына, қырып салуға құмар жауыз жандардың теріс әрекеті арқылы оқырманына ой салады. Сонымен қатар, шығармада автор қорықшы қызметінің маңызын, сол саладағы қиындықтарды жеткізеді, шенділердің қызметін асыра пайдалануы, жазықсыз жандардың түрмеге тоғытылуы сынды қазіргі қоғамдағы күрделі жайттарды да сөз етеді. Қорыта айтсақ Сабырбек Олжабай бұл әңгімеде обырлар мен жебірлерге, қайырымсыздар мен қанағатсыздарға, тойымсыз тоғышарларға, адамдық қасиеттен ада аяусыз жандарға сын қаламын сілтейді, адамзатты мейірімділік пен адалдыққа, жақсылық пен жанашырлыққа үндейді. #аудиокітап