ДУРЛАСАН ЦАС ❄❄❄❄❄ 2004 онд хэвлэгдсэн "Зүрхэнд үйлдвэрлэв" номд багтсан галзууртлаа дурласан цасны тухай өгүүлдэг "Дурлал" өгүүллэгээ ДУРЛАСАН ЦАС хэмээх дууны үг болгосон юм. Өгүүллэг дуу болсон түүх байдаг эсэхийг мэдэхгүй байна. Ямартай ч ая зохиогч Т.Пүрэвсүх тэр жил yahoo messenger-ээр холбогдоод надаар үг бичүүлэх 5 ая байгааг дуулгаж, захиалгаа өгсөн юм. Тэдгээр дуунуудын нэг аялгуунд дурласан цасны тухай өгүүллэг маань маш сайн тохироод байсан тул сонсож байгаад үгээ зоосон. Пүрэвсүх "Энэ дуунуудыг дуулах хүн нь Японд байдаг, удахгүй Монголд ирэх юм" гээд учир битүүлэг, нууцлаг юм яриад байсан тул лавшруулж асуусангүй. Төдөлгүй "Дурласан цас" дуу ч гарав. "Элсний нүүдэл" киноны дууг дуулсан хоолойг сонсоод "Энэ бүсгүйд л дуугаа өгөх юмсан" гэж нууцхан бодож явсан Баярцэцэг "Дурласан цас"-ыг дуулсныг мэдээд би хувьдаа их баярласан. Гэхдээ бид уулзаагүй юм. Хожим Зайсангийн нэгэн байранд нүүж ороод удаагүй байхдаа нэг өглөө хогоо асгахаар гартал яг орцны үүдэн дээр мөн л хог асгаж явсан Баяраатай халз нүүр тулчихав. "Чи Баярцэцэг үү? Би "Дурласан цас"-ын шүлгийг бичсэн хүн байна" гэж хэлээд хоёулаа дуу алдан танилцлаа. Тэгтэл бид хоёр бүр нэг орцонд амьдардаг болж таарав. Хөршүүдийн ёсоор орж гарч, зэрэг шахам бие давхар болж, хөдөө гадаа явсан хойгуур орон гэрийг нь эргэж тойрч явах зуур уран бүтээлүүд яригдаж л байлаа. Ингээд л Баярцэцэгт өгсөн шүлгүүдээс бүтсэн "Намайг хүлээсэн эх орон", "Уулзвар дээр", "Бодол", "Хязгааргүйн цаана", "Наашаа суу", "Намайг зур" дуунууд ар араасаа төрөн гарчээ. Үг Х.Болор-Эрдэнэ
