VIDEO
Быйыл Боотулуу нэһилиэгэр Улуу Кыайыы 80 сыллаах үбүлүөйүн бэлиэтиир тэрээһиннэр чэрчилэринэн, от ыйын 16 күнүгэр Чинэки Эбэтигэр тиийэ сырыттыбыт. Бу айаҥҥа Чинэкиттэн төрүттээх, билигин Боотулууга олорор аҕам саастаах көлүөнэ дьонноро, үлэ ветераннара: Николаев Сергей Иванович, Данилов Данил Федорович уонна Яковлев Михаил Иванович кыттыыны ыллылар. Кинилэри кытта Дьокуускайтан бэйэтин үлэтинэн кэлэ сылдьар учуонай Саввинов Григорий Николаевич, кини коллегата Макаров Виктор Семенович барса сырыттылар. Бу киинэ уһуллуутугар устар бөлөх Иванов Анатолий Титович, Васильев Василий Лукич үлэлээтилэр. Үөһэттэн квадрокоптерынан Чинэки Эбэ панораматын устууну учуонай Макаров В.С. оҥордо. Бу манна, 1930-с сыллартан саҕалаан Чинэки Эбэтигэр кииннээн тэриллэ сылдьыбыт "Чинэки" холкуос киин уһаайбатын оннун көрдүбүт, оччотооҕу дьон тустарынан олохтоохтор сэргэх сэһэннэрин, ахтыыларын иһиттибит. Сэрии саҕана, онтон сэрии кэннинээҕи 50-60-с сылларга бу манна дьоҕус бөһүөлэк үөскүү сылдьыбыт эбит. Ол туһунан, холкуос бырабылыанньатын, балыыһатын, оскуолатын, лааппытын, миэлиҥсэтин, онтон да атын хаһаайыстыбаннай тутуулар турбут миэстэлэринэн кэрийэ сылдьан аҕам саастаах Чинэки дьонноро бэрт үчүгэйдик быһааран кэпсээтилэр. Онтон Эбэни эргийэ олорбут оччотооҕу кэмҥэ олорон ааспыт ыаллар өтөхтөрүнэн кэрийэн сылдьан, кимнээх ханан олорбуттарын көрдөрөн, кэпсээн, ахтан-санаан аастылар. Түмүккэ, холкуос киин уһаайбатын миэстэтигэр, Чинэкиттэн Аҕа дойдуну көмүскүүр Улуу сэриигэ барбыт буойуннарга анаан туруоруллубут кэриэстэбил сэргэтин аттыгар Григорий Николаевич Саввинов "Саллаат суола оспот" диэн аҕатыгар, Чинэкиттэн төрүттээх фронтовик Саввинов Николай Петровичка анаммыт кинигэтин айан кыттыылаахтарыгар алгыс тылы этэн туран бэлэх туттарда. Инникитин бу маннык айаннар оччотооҕу "Саха АССР 10 сыла", Сергей Миронович Киров аатынан, "Сэбэдьээн" уонна "Кыһыл олох" холкуостар сирдэригэр-уоттарыгар эмиэ тэриллиэ диэн эрэнэбит.
