Сайт использует сервис веб-аналитики Яндекс Метрика с помощью технологии «cookie». Пользуясь сайтом, вы даете согласие на использование данной технологии.
Мен жасымда, жігіттер, топтан астым, Менменсіген талайдың көңілін бастым. Қасыма ерген жігітке олжа салып, Бір түнде сегіз қызды алып қаштым. Абылай аспас Арқаның сары белі, Қуандық пен Сүйіндік жайлайды елі. Қырық мың жылқы су ішсе лайланбас, Нияздың Аюлы мен Қаракөлі, Бұғылы мен Тағылы бүркіт салған, Ұйпалақтап бауырыңнан түлкіңді алғам. Есіл, Нұра, Ереймен, Қара қойтас, Көзімнен бұлбұл ұштың, дүние жалған. Ақтау, Ортау, Сарысу, Көктіңкөлі Жаз болса жайлаушы еді қонып елі Сағынғанда көзіме бір көрінші Ақ туын Кеңесары тіккен жері Күйгенжарды аулым жанай қонған Әкем Құтпан кешегі қандай болған Қазы-қарта жемейтін қайран басым, Түрменің қара наны балдай болған. Ботақара жолымда қаласың ба Ереймен мен Баянның арасында Тоғыз жасар Дәулетхан жетім қалып Қасқырдың тірі жүрген баласындай Бұл жалғанда мен неге тұрақтайын Көлге біткен айдын тұрақтайын Қарсы келген дұшпанның талайларың Бақыртып сабаушы едім лақтайын Қыран едім, қор болдым, торға түсіп, Аспаныма шығармын бір күні ұшып. Бар қатыны қыпшақтың ұл туса да, Сонда да бола алмайды Иманжүсіп. Кісендеулі аяқ-қол, кетті тыным, Тар қапаста өксумен өтті күнім. Торға түскен торғайдай тыпыршиды, Жаңғыртқан Сарыарқаны қайран үнім.
