28 қыркүйекте AlmaU қабырғасында өткен Unknownkazak Talks-тың спикері болдым. «Филиппин қалай бодан болды?» тақырыбында сөз сөйледім. Неге бұл тақырып? Биыл қаңтар айында Филиппин еліне саяхаттап қайттым. Бес жүз жыл бойы отар болған мемлекет. Бес ғасырдай өзгеге күні қараған ел бүгін түпкі тілін, ділін, дәстүрін ұмытқан. Экономикасы тым қарапайым. Халқы қызмет көрсетуші классқа айналған, басым бөлігі кедей. Білімге, дамуға деген құштарлығы төмен. Адами капиталы тиімсіз. Азаматтары қоғам өміріне бейжай қарайды, белсенді араласпайды. Сонымен қатар, діншіл. Жалпы тақырыпқа Филиппин мемлекетін үлгі ретінде ала отырып, деколонизация мәселесін қозғадым. Деколонизация мәселесі отар болған мемлекет үшін менталды түрде ауыр тақырып. Отар болғаныңды мойындаудан қашу, өткенді романтизациялап, батырларды ұлықтай беру, жалған намыс сынды дүниелер біздің қоғамға да тән. Оның нәтижесін өздеріңіз баспамыздан шыққан «Как управлять казахами» кітабына қатысты туған резонанста байқадыңыздар.
