«БІЗДІҢ ӨМІР» ✍️ Ақжол Түменбай 🎼 Үкітай Ерниязов Біздің табыс, намыстан да жоғары, Намыстардың "арыстарға" обалы. Біздің Отан - жалдамалы тұрғын үй, Біздің қоғам - қайыршылар қоғамы. Біздің билік, естімейді шындықты, Біздің билік, байқамайды сұмдықты. Марапатын сұрап алған қайраткер, Медальдарін сатып алған кіл мықты. Біздің тіл де жүре алмайды түрегеп, Қай бабаның мазарына түнемек?! Мемлекеттік рәміздерім сувенир, Мемлекетім мүгедек. Атқарам деп алда-жалда міндетті, Ақ жағасын, абыроймен кірлетті. Біздің әкім өскеннен соң өледі, Біздің ақын өлгеннен соң құрметті. Талай-талай заман салып араға, Ақытығыңды дәлелдейсің қараға. Біздің достық сатылады ақшаға, Біздің бастық сатылады параға. Көзім ашық деп ойлаймыз күнімен, Көз жоқ жерде бүлінеміз түнімен. Біздің жаға жыртылады ініден, Біздің аға қырқылады тілінен. Шылбырыңды беріп қойып бөтенге, Ақ ордада сауда-саттық көтерме. Қыз мұратын орындапты көп қазақ, Қашып кетіп шетелге. Кім қарақшы, кім елбасы, кім болыс? Пенделерге адам болу шын борыш. Біздің өмір қолда барда қадірсіз, Біздің өлім молдаларға күнкөріс.
