СУВ ҲИСОБЛАГИЧЛАРНИ ЯНГИСИГА АЛМАШТИРИШ ПУЛСИЗМИ?

Вазирлар Маҳкамасининг 2019 йил 21 августдаги тегишли қарори ижроси доирасида маиший ҳисоблагичларни қиёслаш лабораторияси ташкил этилган. 2019 йил 1 ноябрдан 2022 йил 21 сентябргача қиёслашдан ўтказилган сув ҳисоблагичлар сони 263 минг 645 тани ташкил этмоқда. “Ўзсувтаъминот” АЖ ҳамда Жанубий Кореянинг “K-water” ташкилоти билан имзоланган меморандумга асосан, Тошкент шаҳрининг Миробод тумани, Қўйлиқ 2, 3 ва 4-мавзесида 7 минг 850 та сув ҳисоблагичлари ўрнатиш ҳамда биллинг тизимига улаш белгиланган бўлиб, ҳозирги кунда жами 1 минг 900 та сув ҳисоблагич ўрнатилди. Шу билан бирга, Тошкент шаҳрининг Шайҳонтохур туманидаги 40 та хонадонга жами 41 дона замонавий сув ҳисоблагич ўрнатилган. Умуман олганда, бугунги кунда биллинг базасида мавжуд 4,3 миллиондан зиёд абонентларнинг 63 фоизи сув ҳисоблагичлари билан таъминланган. Ўзбекистон Республикаси Президентининг жорий йил 24 майдаги “Аҳолининг ичимлик сув таъминоти ва оқова сув хизматлари билан таъминланганлик даражасини ошириш бўйича қўшимча чора-тадбирлар тўғрисида”ги қарори ижросини таъминлаш мақсадида “Ўзсувтаъминот” АЖ қошида Совуқ ва иссиқ сувни ҳисобга олиш ускуналарини (ҳисоблагичларни) ечиш, қиёслашдан ўтказиш ҳамда ўрнатиш бўйича метрология хизмати ва унинг ҳудудий филиаллари ташкил этилди. Ҳозирда метрология хизматини ва унинг ҳудудий филиалларини аккредитациядан ўтказиш жараёни кетмоқда.