Н.Назарбаев: Қазақтың тарихи Отаны біреу, ол – Қазақстан

Елге ел қосылса, құт. Бүгін әлемнің түкпір-түкпірінде тұратын исі қазақ арқа төсінде, Дүниежүзі қазақтарының 5-ші құрылтайында бас қосты. Алғашқысы 1992 жылы Алматыда өткен. Сол жолы Дүниежүзі қазақтарының қауымдастығы құрылып, оның төрағасы болып Нұрсұлтан Назарбаев сайланды. Одан бергі Түркістанда және Астанада өткен 2-ші, 3-ші және 4-ші құрылтайларда негізінен шеттегі қандастарымызды елге тартудың тетіктері қаралды. Нәтиже бар. Бүгінге дейін сырттан миллионға жуық қаракөзіміз оралып, ортамыз толды. Бірақ әлі де атажұртын аңсап жүрген ағайын көп. Араларында мойындалған ғалым да, аты шыққан спортшы да, дәулеті тасыған кәсіпкері де бар. Айтпағымыз жат елде оларды өзекке теуіп отырған ешкім жоқ. Өздері туған жер топырағына қазығын қаққысы келеді. Өз елімізде өсіп-өнуді армандайды