Елбасы Қырғызстан Президенті Сооронбай Жээнбековпен кездесті

Астана мен Бішкек қатынасы қайта жандана түседі. Қырғыз елінің жаңадан сайланған Президенті Сооронбай Жээнбеков Астанаға ресми сапармен келді. Нұрсұлтан Назарбаев әріптесін Ақордада қабылдап, әуелі екіжақты, сосын кеңейтілген құрамда кездесу өткізді. Бұл Сооронбай Жээнбековтың Президент ретінде Астанаға алғаш келуі. Нұрсұлтан Назарбаев әріптесін арнайы шақырды. Сондықтан Елбасы мәртебелі мейманды үлкен ықыласпен қарсы алды. Қазақстан мен Қырғызстан – стратегиялық әріптес. Тарихы тамырлас, мәдениеті сабақтас. Түбі бір, түрі де бір. Тереңнен бастау алатын ынтымақтастық жалғаса бермек. Тіпті жандана түспек. Оған қос ел басшысы да, бауырлас қазақ-қырғыз халқы да мүдделі. Шағын құрамда өткен келіссөздер барысында көшбасшылар әуелі екі ел ынтымағын сөз етуі сондықтан. Аймақтық, халықаралық күн тәртібіндегі мәселелерге тоқталып, екі жақ интеграциялық ұйымдар аясындағы ықпалдастықты талқылады. Нұрсұлтан Назарбаев, Қазақстан Республикасының Президенті: Менің шақыруыммен ресми сапармен келіп отырған, бастаған жолыңыз ақ болсын, құтты болсын! Екі еліміздің достығы мен болашағына жұмыс істейтін болайық. Біз сіздерді күттік. Қуанышпен қарсы алып отырмыз. Сіз бастап келген қырғыз делегациясының барлық қойған мәселесін шешуге Қазақстан жағы әр уақытта дайын. 26 жыл тәуелсіздік жағдайында өмір сүріп келе жатырмыз. Қазақстан Қырғызстанға бірде бір рет сөз тигізіп, басқа жағынан жаманшылық жасауға бір қадам жасаған жоқ. Ол дұрыс. Себебі біз келеміз, кетеміз. Екі көрші ел қалады. Бізден бұрын да болған. Әйтпесе ата-бабамыз қайда? Бірлік енді болады. Сондықтан әр ұрпақтың мойнында тұрған жүгі – жақсылықты, достықты, қарым-қатынасты тап-таза күйінде келесілерге тапсыру. Сондықтан қош келдіңіз! Сооронбай Жээнбеков, Қырғыз Республикасының Президенті: Құрметті Нұрсұлтан Әбішұлы, Сізге рахмет! «Қазақстанға ресми сапармен келіп кет» деп шақырғаныңыз үшін мен Сізге терең ризашылық білдіремін! Астанаға түскен сәттен бастап жылы күтіп алдыңыз. Сіз біздің ақсақалымыз, ағамызсыз. «Көп мәселені бір туған шешеді» деп жақсы айттыңыз. Біздің дипломатиялық қарым-қатынас құрғанымызға, мәміле түзгенімізге 25 жыл болды. Сөз жоқ, екі жақ серіктестікті тереңдетуге мүдделі. Бұл қарекетін айыр қалпақты ағайынның басшысы бір ай бұрын Минскіде Нұрсұлтан Назарбаевпен кездескенде айтқаны ел есінде. Ол кезде екі жақ үкіметтік топ құрып, Жол қартасын әзірледі. Нәтиже жақсы. Шекара ашылып, екі жақ еркін қатынай бастады. Ендігі кезекте, мұндай келеңсіздіктерге жол бермей, тек татукөршілік байланыстарды нығайтуға басымдық берілмек.