Май месяцö Белоево посадiсь культура керку лоас пöдналöм.

Керны этшöм оськöв корöны надзорнöй органнэз. Строитöм эта культура керкуыс вöлi 1959 годö. Эта кадсянь зданнёыс бура важмис. Öнi татöн корсьö ыджыт ремонт. Да и пожарнöй безопасность ладорсянь культура керку некыдз оз соответствуйт колана нормаэзлö, сiйöн надзорнöй органнэзлöн аркмис öтiк требованнё - пöднавны. Местнöй бюджетлöн деньга вылö бырöтны быдöс предписаннеэсö татöн оз вермö, эд этö не дзир умоль проводка, но и полiньтчöм потолок да джоджжез, осьтаэза стенаэз и сiмöм трубаэз, и нельки гор, кöда татöн унажыксö сулалö не лонтöм, а зданнёсö видзöм понда. Сiйöн отсöт видзчисьöны крайсянь. Öнi уджалiссез гижисö губернаторлö письмо. Эд зданнёлöн судьба и культурнöй деятельность тöждöтöны унаöс. Ежели нылö оз отсалö, даснёль специалист, дасöтiк коллектив и эшö уна творческöй отир кольччасö немтöг. А эд нiя велалiсö ни дорйыны округлiсь ним быдкодь краевöй и всероссийскöй фестиваллез-конкурссэз вылын, а босьтöм заслугаэз и победаэз оз тöдö пом. Кытчöдз жö вильсö строитны эз лöсьöтчö, уджавны культара керкуись специалисттэз ыджыт надеждаöн, что матын кадö мый-нибудь вежсяс, вуджасö челядь садлöн важ зданнёö.