Сайт использует сервис веб-аналитики Яндекс Метрика с помощью технологии «cookie». Пользуясь сайтом, вы даете согласие на использование данной технологии.
#qyzylordatv Биыл Исатай Әбдікәрімов атындағы Қызылорда аграрлық техникалық жоғары колледжінің құрылғанына – 95 жыл. Мерейтойға орай білім ошағында сала үздігі Мәжит Өтемұратов атындағы зертханалық кабинет ашылып, ғылыми-практикалық конференция ұйымдастырылды. Исатай Әбдікәрімов атындағы Қызылорда аграрлық техникалық жоғары колледжі кәсіби жұмысшы мамандар даярлайтын өңірдегі бірден-бір оқу ошағы. 95 жылдың бедерінде бұл білім ұясынан талай тарландар түлеп ұшты. Мерейтойлық кешке солардың бірсыпарасы ат арытып арнайы келген. Бүгінде ардагер атанған үздік түлектер Исатай Әбдікәрімұлының ескерткішіне гүл шоғын қойып, колледждің тың бастамаларымен танысты. Бұл білім ұясының қарышты дамуына жүздеген қайраткер үлес қосты. Солардың ішінде кәсіптік білім беру ісінің үздігі Мәжит Өтемұратовтың шоқтығы биік. Парасат иесі 2007-2015 жылдар аралығында осы колледжге басшылық жасап, оқу үдерісіне заманауи технологиялар енгізді. Енді асыл азаматтың еңбегі еленіп, арнайы зертхана кабинеті ашылып отыр. Мұнда студенттер кәсіби білігін практикалық тұрғыда ұштауға жан-жақты жағдай жасалған. Жалпы аталмыш колледжде 1800-ден астам студент білім алуда. Соның 80 пайызға жуығы мемлекеттік грант негізінде оқиды. Биыл мұнда бірнеше білім беру бағдарламасы халықаралық стандарттау жүйесінен өтті. Енді алдағы 5 жылда барлық мамандық толыққанды сапа сынынан өткізіліп, жаңа заманғы білім беру көшінің төрінен көрінбек. Колледждің 95 жылдық мерейтойы ғылыми-практикалық конференцияға ұласып, білім беру үдерісін дамыту жайы сараланды. Сайт - Facebook - / qyzylordatv Instagram - / qyzylordatv Telegram - Tiktok - / qyzylorda_tv
