VIDEO
Саха биллэр композитора, Амма улууһун өрөгөйүн ырыатын музыкатын суруйбут, эдэр композитордар Бүтүн Сойуустааҕы конкурстарын лауреата, Арассыыйа композитордарын сойууһун чилиэнэ, Саха Өрөспүүбүлүкэтин искусствотын үтүөлээх деятелэ, Амма улууһун, Амма нэһилиэгин бочуоттаах олохтооҕо, Амматтан үрдүк үөрэхтээх соҕотох киэн туттар композиторбыт Егор Ильич Неустроев-Тулуйхан 70 сааһын бэлиэтиир “Маэстро Тулуйхан” үбүлүөйдээх биэчэрэ Амматааҕы Ф. Потапов аатынан норуот айымньытын дьиэтигэр үөрүү-көтүү көтөллөөх үрдүк таһымҥа ааста. Бу күн ытыктыыр уһуйааччыларын, убаастыыр учууталларын саха эстрадатын ырыаһыттара Байбал Сэмэнэп, Василий Еремеев, Эрчим, Алексей Потапов, Санита Ай, Люси, итиэннэ Иван Иванов-Ванс, Александра Матвеева-Мичийэ, Анна Акимова уонна Снежана Егорова эҕэрдэлээтилэр, ылбаҕай ырыаларын бэлэхтээтилэр. Кэнсиэри өрүү да буоларын курдук, Егор Ильич олоҕун аргыһа, 50 сыл бииргэ “эн-мин дэһэн” иллээхтик, эйэлээхтик олорбут Светлана Александровна Неустроева иилээн-саҕалаан ыытта. Хас биирдии кыттааччыны сиһилии билиһиннэрэн дьон болҕомтотун тарта, сэҥээриитин ылла. Үөрүүлээх күҥҥэ Амма улууһун баһылыга Степан Кузьмин бэйэтин эҕэрдэтигэр: “Хайдах Тулуйхаҥҥа сылдьыбатаҕым буолла? Этэргэ диэри, сайын аайы Болугурга дьиэм тэлгэһэтин таһыгар лааҕыр тэрийэллэрэ ээ”, – диэн саҥа аллайар. – “Кырдьык, Егор Ильич уонна Светлана Александровна Неустроевтар бу биһиги эрэ улууспут буолбакка, республика социальнай-экономическай, культурнай сайдыытыгар сүдү кылааттарын киллэрбит, бар дьон тапталын, билиниитин ылбыт айар куттаах музыкальнай дьиэ кэргэн буолаллар. Ону биһиги бары билэбит уонна үрдүктүк сыаналыыбыт. Кинилэр 90-с сыллартан саҕалаан үгүс саха ыччатын эстраднай ырыаҕа уһуйаннар, күн бүгүн саха эстрадатын саамай чаҕылхай сулустара, үтүөлээх артыыстара Тулуйханнар иитиллээччилэрэ буолалларынан киэн туттабыт!” – диэн Степан Николаевич бэлиэтээн эттэ уонна Егор уонна Светлана Неустроевтарга Амма улууһугар бэйэлэрэ баҕарбыт сирдэригэр уһаайба ылалларыгар туоһу суругу дохсун ытыс тыаһын ортотугар туттарда. Салгыы дьоро күн буруйдааҕын Амма нэһилиэгин баһылыга Михаил Артемьев, улуустааҕы культура управлениетын салайааччыта Иван Иванов, Амматааҕы Ф. Потапов аатынан норуот айымньытын дьиэтин дириэктэрин солбуйааччы Николай Пухов уонна Неустроевтар аймах ааттарыттан Владлена Неустроева эҕэрдэлээтилэр, махталларын биллэрдилэр. Нэһилиэк дьаһалтата 30 000 солк., культура управлениета 20 000 солк. суумалаах сертификаттары үөрүүлээх быһыыга-майгыга туттардылар. Бары билэрбит курдук, Тулуйханнар филиаллара Сахабыт сирин бары муннугар, бэл, кытыы кыра нэһилиэктэргэ арыллан айымньылаахтык, таһаарыылаахтык үлэлииллэр, төрөппүттэр махталларын ылыан ылаллар. Арай биһиги эрэ Аммабытыгар “Тулуйхан” студия суох эбит. Дьэ, бу улахан итэҕэһи суох оҥорорго культура управлениета уонна нэһилиэк дьаһалтата күүскэ үлэлэһиэх буоллулар. Аны сайын Аммабыт нэһилиэгэр ырыа оҕо лааҕыра тэриллэн үлэтин саҕалыаҕа диэн үөрүүлээх сонуну иһиттиннэрдилэр. Маны таһынан Дьокуускай куоракка Егор Ильич Неустроев-Тулуйхан үбүлүөйдээх сылынан улахан ырыа түһүлгэтэ тэриллэрэ былааннанар. Төһө да үлэ күнэ буоллар көрөөччүлэр көрдөһүүлэринэн айар куттаах дьиэ кэргэн бу күн үс чаастаах икки кэнсиэри үрдүк таһымҥа биэрдилэр. Тулуйханнар бииртэн биир киһи кутун-сүрүн тутар ылбаҕай ырыалары бэлэхтээннэр Амма дьонун-сэргэтин сүрэҕин үөртүлэр, дууһатын абылаатылар. Вера Иванова #маэстро #тулуйхан #композитор #егорильичнеустроев #юбилейноешоу #концерт #эстрада #сахалыыырыалар #сахасирэ #yakutia #амга #якутия #амма #нвксаха #якутскиепесни
