Сайт использует сервис веб-аналитики Яндекс Метрика с помощью технологии «cookie». Пользуясь сайтом, вы даете согласие на использование данной технологии.
"Атомда электрондардың таралуы" тақырыбындағы сабақ. Атомдар протон, нейтрон және электроннан тұрады. Атомда электрондар белгілі бір қабат- бұлт түзіп орналасады. Дат ғалымы Нильс Бор электрондардың таралып орналасуын диаграмма көмегімен көрсетуді ұсынды. Электрондар энергетикалық деңгейлерге бөлініп орналасады. Атомдағы энергетикалық деңгейдің санын периодтық жүйедегі период нөмірі арқылы анықтайды. Әрбір деңгейде электрондардың белгілі бір саны ғана орналасады және ядродан алшақтаған сайын олардың саны артады. Энергетикалық деңгейлерді сандармен 1, 2, 3, 4, 5, 6, 7 немесе әріптермен K, L, M, N, O, P, Q деп белгілейді. 1(K) деңгейде 2 электрон, 2(L) деңгейде 8 электрон, 3(M) деңгейде 18 электрон, 4(N) деңгейде 32 электрон бола алады. Атомда протондар мен электрондар саны тең болғандықтан, атом электрбейтарап бөлшек. Атомдағы электрондардың энергиялары әртүрлі, олардың біреулері ядроға күшті, басқалары әлсіз тартылады. Электрондар ядроға қаншалықты жақын болса, соншалықты жақсы тартылады, алайда олардың энергия қоры аз болады. Атом ядросынан алыстаған сайын электронның ядроға тартылу күші азаяды, бірақ энергия қоры арта түседі. Энергия қорының мәні бір-біріне жуық электрондар бір электрондық қабатқа немесе энергетикалық деңгейге орналасатынын анықтайды.
