Түрлі-түсті металл мен қара темірді шет елге шығаруға шектеу қойылады дегенді естіген Жамбыл облысындағы кәсіпкерлер қарсылықтарын білдірді. Темір-терсек теріп, кесіп, тиеп жан баққан ел металл қалдықтарын экспорттау тоқтатылса, мүлде табыссыз қалып, банкрот боламыз деп уайымдап отыр. Сөздерінше, шенеуніктер «мемлекеттен онсыз да қыруар қаржы алып отырған ірі кәсіпорындарға қосымша қолдау көрсетеміз» деп шағын кәсіп иелерін біржолата құрдымға жібермек. Ал шектеу енгізген Индустрия және инфрақұрылымдық даму министрлігінің мұндай қадамға барғаннан басқа амалы қалмапты. Шоқан Тұрғанов металл қалдықтарын қабылдап, сұрыптап Ресей, Өзбекстан, Пәкістанға экспорттап келген. Қол астында 50-ге жуық жұмысшысы бар. Айтуынша, салықтан жалтарған немесе қызметкерлерінің жалақысын кешіктерген кезі жоқ. Қазір әр жұмысшы кемі 250, ал көбі 350 мың теңге көлемінде айлық алады екен. Бірақ мұның бәрі бір-ақ сәтте көрген түстей өте шығуы мүмкін дейді кәсіпкер. Себебі министрлік темір-терсекті шет елге шығаруға шектеу қоя бастаған. Оны отандық өнеркәсіпті қолдау деп түсіндіріпті. Яғни, зауыттарда шикізат жоқ екен. Ал кәсіпкердің темірді отандық компанияларға өткізгісі келмейді. Өйткені, бағасы арзан, ал жеткізу қымбат. ШОҚАН ТҰРҒАНОВ, кәсіпкер: – Мысалы көмір болсын, цемент болсын, басқа бір бұйымдар, ағаш бұйымдарын жіберсең Қарағандыға оның тарифі 350 мың-300 мың теңгемен барады да. Ал бір вагон темір 1 миллионнан асып кетеді. Тариф өте жоғары. Темірге сондай тариф қойып тастаған. Сөйтіп, бізге әкеліңдер дейді. Апарғанмен олар уақытылы ақшасын бермейді. Кәсіпкер темір қалдықтарын тасымалдау әсіресе, соңғы екі-үш жылда қиындап кетті дейді. Сөзінше, шенеуніктер ыңғайына қарай, қаласа шектеу қояды, сосын ай өтпей шектеуді қайта алып тастайды. Ал мұндай жағдайлар бизнесіне теріс әсер етіпті. Яғни, кәсібі тұралап, жұмысшылары үйде отырып қалады екен. Министрлік өкілдері отандық зауыттарға шикізат жетпей жатқанын растады. Сондықтан темір-терсекті шет елге шығаруға уақытша шектеу қоюға тура келіпті. Айтуларынша, күні кеше министрлік пен шикізат өндіретін кәсіпорын және металлургиялық компаниялардың арасында үш жақты ұзақ мерзімді келісімшарт жасалған. Соған сәйкес, темір-терсектің көлемі, сапасы, жеткізілген тауар ақысының уақытылы төленуі, бәрі-бәрі қамтылған деді Жанат Игісінов. ЖАНАТ ИГІСІНОВ, ҚР ИИДМ басқарма басшысы: – Біз темір-терсек қабылдайтын бекеттер жабылмайды деп ойлаймыз. Себебі елімізде металл қалдықтарын алатын кәсіпкерлер көп. Сондай-ақ, министрлік нормативті-құқықтық актіні қабылдар кезде кез келген транспортпен түрлі-түсті металлды және елімізде өңдеуге келмейтін қоспасы бар болатты жөнелтуге қатысты мәселеге баса назар аударады. Кәсіпкерлер отандық өнеркәсіпті қолдауға қарсы емеспіз дейді. Бірақ билік өкілдері де кішігірім бизнесмендердің пікірімен санасса деп тілейді. Яғни, ең алдымен шектеуді алып тастау қажет. Болмаса, алпауыт компаниялар тасымалдау құнын арзандатып, темір бағасын көтеріп берсін деп талап қойды. Нұрболат Жаңабекұлы, Дәулетбай Нұрмахан Бізді әлеуметтік желіде оқыңыздар: Youtube - / @informburo31kanal Facebook - / informburo31 Instagram - / informburo31 Vkontakte -
https://vk.com/informburo31 TikTok - www.tiktok.com/@informburo31 WhatsApp Информбюро +7 777 331 31 31 #қараТемір #экспорт #кәсіпкерлік
