Зейнетақы қорына ақша аудармағандардың есепшоты бұғатталады

Зейнетақыға ақша салмаған қазақстандықтардың банк шоттары бұғатталады. Келесі жылдан бастап бұл шара қарызы 26 мың теңгеге жуықтаған азаматтарға қолданылады. Мемлекеттік кірістер комитетінің мәлімдеуінше, әуелі ескерту жолданады. Еленбеген жағдайда бірден аударым жасауға, карта қолдануға шектеу қойылмақ. Қатаң тәртіп нақты кімдерге қатысты? Нені білген жөн? Тақырыпты әріптесім Оразай Нұртайұлы жалғастырады. ОРАЗАЙ НҰРТАЙҰЛЫ, тілші: Енді зейнетақы қорына ақша аудармағандардың есепшоты бұғатталады. Жұмыс берушілер, жеке кәсіпкер ретінде тіркелген азаматтар міндетті жарналарды әр айдың 25-нен кешіктірмей салып отыруы тиіс. Болмаса салық органы әуелі ескерту жасайды, 10 күнде қарыз жабылмаса банк картасына, ақша айналымына шектеу қояды. ҚАЙСАР АРЫН, ҚР мемлекеттік кірістер комитетінің басқарма басшысы: Біреуге жұмыс істеп жүрсе ол үшін жұмыс берушісі салық есебін тапсырады және сол жұмыс берушісіне шара қолданылады. Ал енді өзі жеке болып тіркелсе, әрине өзіне шара қолданылады. Бұл жерде жеке кәсіпкер деген түсінік бар, жеке тұлға деген түсінік бар. Жеке тұлғаға қарсы біз шара қолданбаймыз. Экономистердің пікірінше, бұл тәртіп жұмысын жаңадан бастаған мекемелерге, әсіресе бизнеске енді аяқ басқан кәсіпкерлерге үлкен кедергі болады. Есепшотты бір күнге жапқанның өзі қомақты шығын, сол үшін қарызды өтеу мерзімін ұзарту керек дейді. Тіпті бұғаттаудан басқа балама жолын қарастырған дұрыс деген пікірде. БАУЫРЖАН ЫСҚАҚОВ, экономист: Форс-мажорға байланысты, мүмкін бір саяси факторлар немесе экономикалық қиындықтарға байланысты болып жатқанын ескермей, шоттарды бұғаттай беретін болсақ оның соңы экономикалық қиындықтарға әкелуі мүмкін. Сол үшін де бірінші кезекте алдын ала ережелері уақыты, мерзімі дұрыс анықталу керек. Мемлекеттік кірістер комитеті өкілінің айтуынша, зейнетақы жарнасын төлемегендердің есепшотын бұғаттау бұрыннан бар заң. Бірақ қазіргі тәртіп бойынша 1 теңге қарыздың өзіне ақша айналымына толық шектеу қойылып жүр дейді. Ал келер жылдан бастап зейнетақы мен әлеуметтік төлемдерге қарызы 26 мың теңге жуықтаған жағдайда және борыш сомасына ғана бұғаттау көзделіп отыр. #Информбюро #31арна #БастыЖаңалықтар #Новости #31канал