Айсұлу Байқадамова (1927 – 1992). "Дала сандуғашы". Әні: Б.Байқадамов., Сөзі: Ә.Тәжібаев

Байқадамова Айсұлу 1927 жылы Торғай өңірінде көрнекті қоғам қайраткері Байқадам Қаралдиннің отбасында дүниеге келген. Айсұлудың әкесі Байқадам да, анасы Үрзипада өз жанынан ән шығарға өнерлі кісілер. Байқадам мен Үрзипа патша заманының өзінде-ақ Торғайда қүрылған театр үйірмесіне мүше болып, онда жергілікті ақындардың айтыстарын сахналық көрніс қылып көрсеткен, шет елдік драмаларды аударып сахналаған. Осындай өнерлі отбасында дүниеге келген Бақытжан, Айсұлу, Данабикелер бар қазаққа белгілі тұлғалар болып шықты. Бақытжан Байқадамов тұңғыш хор капелласының негізін салса, Айсұлу белгілі опера әнші болды. Айсұлу мәскеу консерваториясында білім алған. Қазақ опера және балет театрында Жібек (Е.Г. Брусиловский, “Қыз Жібек”), Ажар (А. Жұбанов пен Л. Хамидидің “Абайында”), Сара (М.Төлебаевтың “Біржан-Сарасында”), Шура (Н. Тілендиев пен Қ. Қожамияровтың “Алтын тауларында”), Қамар (Е. Рахмадиевтің “Қамар сұлуында”), Марфа (Н.А. Римский-Корсаковтың “Патша қалыңдығында”), Лакме (К.Ф. Делибтің “Лакмесінде”), Людмила (М.И. Глинканың “Руслан мен Людмиласында”), Чио-Чио-Cан (Дж. Пуччинидің “Чио-Чио-Cанында”) партияларын орындады. Композитор С.Мұхамеджанов “Айсұлу” операсын Байқадамова Айсұлуға арнап жазған. Мұнда ол Айсұлудың партиясын айтты. Оның шығармашылығына нәзік лирикаға бейім образдар тән. 1961 жылы Қазақстанның халық әртісі атағын алған. 1992 жылы Алматы қаласында өмірден өтті.