Маңғыстаудағы Ақшұқыр ауылында этнолагерь ашылды

Ерекшелігі сол онда демалатын балалар құрақ құрау, қамшы өру секілді халық қолөнерін меңгеріп, ұлттық ойындарды үйренеді. Туған жердің тау-тасын тереңірек тану үшін өлкедегі тарихи жерлерге саяхат жасайды. Ұйымдастырушылар: «Бұл – кейінгі буынның ұлтжандылығын арттырып, ұлттық санасын ояту үшін қолға алынған жоба», – дейді. Ақшұқыр мектеп-лицейінің ауласы уақытша этноауылға айналған. Мұнда киіз үйлер тігіліп, «Өнерпаздар», «Қолөнершілер», «Ұлттық киімдер» мен «Ұлттық ойындар» сынды бірнеше ауыл бой көтеріпті. Өңірге белгілі шеберлер балаларға ши тоқу, киіз басып, құрақ құрауды, ұлттық тағам түрлерін әзірлеуді үйретіп жатыр. Этнолагерьде Ақшұқыр ауылының 300-ге тарта баласы 12 күн тынығып, ата-дәстүрді тереңірек меңгермек. Бірі асық атып, енді бірі тоғызқұмалақ ойнап, өзгелері боз кілемде иық тірестіруде. Қазақтың әні мен күйін тыңдап, ұлттық киімдердің ерекшелігімен танысып жатыр. Қаламқас Тілеубаева, Ақшұқыр мектеп-лицейінің директоры: -Мұндағы мақсатымыз – халқымыздың салт-дәстүрлерін оқушыларға көрсете отырып, насихаттау, олардың бойына елжандылықты қалыптастыру, патриоттық сезімдерін арттыру. Тілімізді, ділімізді, дінімізді, ұлттық өнерімізді барлығын бала бойына сіңіріп өсу керек. Сонда ғана біз нағыз қазақты, нағыз елжанды қазақты, ұлттың болашағын көркейтетін ұл мен қызды тәрбиелейміз деп есептеймін. Мұнда «ЭКСПО-2017» шағын көрмесі де ұйымдастырылды. Оқушылар еліміздегі жасыл технологиядағы жеткен жетістіктерімен танысуға мүмкіндік алды. Жас ұрпаққа туған жердің тау-тасын тереңірек таныту үшін алдағы күндері тарихи ескерткіштерге арнайы саяхаттар ұйымдастырылмақ. Аймақ басшылары балалалардың рухани жан-дүниесін байытуға бағытталған мұндай лагерьлерді өзге де аудандардан ашуды жоспарлап отыр. Авторлары: Гүлмира Әбішева, Ренат Досалиев