Абай облысы адам танымастай өзгереді

Абай облысы адам танымастай өзгереді. Аймаққа тоғыз ай бұрын әкім болып тағайындалған Берік Уәли Астанада атқарған жұмыстарын баяндады. Жоспарларымен бөлісті. Қазір өңірге инвестиция тарту бағыты басты назарға алынған екен. Кәсіпкерлердің қаражаты арқылы индустрия, инфрақұрылым, туризм мен мәдениет салаларын дамыту көзделген. Өңірде өнеркәсіпті өркендетуге бағытталған бірқатар шаралар да қолға алыныпты. Толығырақ әріптесім Динара Ерболқызы айтып берсін. Абай облысында құны жүздеген миллиард теңгені құрайтын 97 инвестициялық жоба жүзеге асырылуда. Оның ішінде алтын өндіру фабрикасы, ірі ет комбинаты және өңдеу өнеркәсібі бар. Жаңа зауыттар іске қосылса, мыңдаған тұрақты жұмыс орны ашылады. Ең бастысы, өңір экономикасына үлкен септігін тигізбек. БЕРІК УӘЛИ, Абай облысының әкімі: Ірі инвестициялық жобалардың бірі – көлемі 577,5 миллиард теңгені құрайтын жалпы ұзындығы – 297,5 км «Аягөз – Бақты» теміржол желісінің құрылысы. Бұл өңірдің және тұтас еліміздің дамуына тың серпін беру үшін Мемлекет басшысының тікелей тапсырмасымен басталған үлкен жоба. Яғни, теміржол желісі арқылы Қазақ-Қытай арасындағы тауар айналымы артпақ. Аймақ басшысы туристік әлеуетті арттыруға да ден қойылғанын мәлімдеді. Мәселен, Алакөлді дамытуға 1 миллиард теңге бөлініпті. Бұл қаражатқа демалушыларға қолайлы жағдай жасалмақ. БЕРІК УӘЛИ, Абай облысының әкімі: Жыл басынан бері іске асырылып жатқан жобалар саны 29-дан 97-ге дейін артты, ал тартылатын инвестициялар көлемі 2,2 триллион теңгеден 3,5 триллион теңгеге дейін өсті. Олардың ішінде, 50 жоба Ұлттық цифрлық инвестициялық платформаға енгізілген. Сондай-ақ, аймақта инфрақұрылымдық жобаларды жүзеге асыру қарқынды жүргізіліп жатыр. Облыс орталығында жаңа көпір мен жүздеген шақырымдық автожол жаңартылуда. Су қоймалары мен ирригациялық жүйелер қайта салынып, ауыл шаруашылығын дамытуға мүмкіндік жасалды. Абай облысы бүгінде өндірісі өркендеп, инвестициясы еселеп артқан өңірге айналды дейді өңір басшысы. #Информбюро #31арна #БастыЖаңалықтар #Новости #31канал